الحــياة دروس والـدنيا تـجـارب
والبشر طلاب داخل مــدرستـها
والليالي ماصفت فيها المشارب
كيف تصفى والهمــوم مكـدرتها
والبشر هذا الزمن مثل العقارب
لو يدينك في مـخابــيك إلـدغـتها
والحسد دايم يجيك مـن الأقـارب
كم بيــوت مــن حسـدها دمـرتها
ومثل مــاقال المثل سدد وقـارب
لا تــقاطــعها ولا تــآمن جــهتها
واجعل الأذكار لك مرسى وقارب
تحفظك من مــوجها وملاطـمتها
وكــم وجيهٍ خلفــها حـقد ومارب
والكلام الزين في روس ألسنتها
وكم وجيه تعجبك والمخ ضارب
لــو تســـرحــها بشــاةٍ ضـيـعـتها
وكـم رجــالٍ تمتلك لـحيه وشارب
عاشت وماتت وهي ما كـرمتها
جعل ما بين المشارق والمغارب
بيني وبين الـرخــوم ومـعـرفتها
واغتنم خوة عطيبين المضارب
الــرجال اللي رفـيعـه مـنزلتها
للحمول الـكايدة ظـهـرٍ وغـارب
لا وطاك الــوقت بانــت منـفعتها
واعرف الناجح ترى دايم محارب
لا تـحطـمك الـرخــوم وبـربـرتها
ولو تشوف اللي تشوفه لاتَغَارب
روســنا ســود الليــالي شــيبتـها
موضوع: قصيدة جميلة 
الأحد أبريل 24, 2016 5:21 pm
